महेन्द्रनगर- ठगी गरेको आरोपमा कञ्चनपुरबाट शिव शिखर बहुउद्देश्यीय सहकारीमा कार्यरत चार जना कर्मचारीलाई प्रहरीले पक्राउ गरेको छ । शिव शिखरको शाखा कार्यालय महेन्द्रनगरमा कार्यरत चार जना कर्मचारीलाई ठगी गरेको आरोपमा प्रहरीले पक्राउ गरेको हो । पक्राउ पर्नेमा सो सहकारीमा कार्यरत गीता शर्मा, केदारनाथ शर्मा, पुष्कर मल्ल र अमिसराज भण्डारी रहेका छन् ।

पक्राउ परेका चार जनालाई नियन्त्रणमा लिएर थप अनुसन्धान अगाडी बढाएको जिल्ला प्रहरी कार्यालय कञ्चनपुरले जनाएको छ । महेन्द्रनगर, त्रिभुवन बस्ती र बेलौरीका बचत कर्ताहरूले आफूले जम्मा गरेको रकम सहकारीका कर्मचारीले हिनामिना गरेको भन्दै जिल्ला प्रहरी कार्यालय कञ्चनपुरमा मुद्दा दर्ता गरेका थिए ।

सहकारी विरुद्ध कञ्चनपुरका तीन हजार ६ सय ७१ जना बचतकर्ताले मुद्दा दर्ता गराएका छन् । बचतकर्ताले जम्मा गरेको बचत रकम फिर्ता माग्दा फिर्ता नपाएपछि सहकारी विरुद्ध उजुरी दिएका हुन् । ठगीमा परेका बचतकर्तालाई जिल्ला प्रहरी कार्यालय कञ्चनपुरले शिव शिखर बहुउद्देश्यीय सहकारी संस्थाविरुद्ध जाहेरी दिन सूचना समेत निकालेको थियो ।

उक्त सहकारीका सञ्चालक समितिका पदाधिकारी तथा कर्मचारीहरूले बचतकर्ताको ३१ करोड ९७ लाख तीन हजार ९ सय रुपैयाँ हिनामिना गरेको बचतकर्ताको आरोप छ । भक्तपुरमा केन्द्रीय कार्यालय रहेको शिव शिखर सहकारी संस्थाका देशभरका विभिन्न ठाउँमा शाखा कार्यालय छन् ।