धनगढी । कैलालीको धनगढीस्थित पञ्चोदय माध्यमिक विद्यालयको ५९ औं वार्षिकोत्सव तथा अभिभावक दिवस बिहीबार विविध कार्यक्रम गर्दै सम्पन्न भएको छ । कार्यक्रमका प्रमुख अतिथि प्रदेश सभासदस्य तथा पूर्वमन्त्री प्रकाश देउवा रहेका थिए ।
देउवाले सामुदायिक विद्यालयको गुणस्तर सुधार्नको लागि शिक्षक, विद्यार्थी र अभिभावकले एकजुट भएर लाग्नु पर्ने बताए । उनले पछिल्लो समयमा सामुदायिक विद्यालय प्रति अभिभावकहरुको विश्वसनीयता बढ्दै गएको बताए ।
वार्षिकोत्सव कार्यक्रममा ऐश्वर्य विद्या निकेतनका प्राचार्य प्रेमनिधि ओझा, शारदा माविका प्राचार्य तेजबहादुर सिंह लगायत विभिन्न विद्यालयका प्राचार्य र पञ्चोदय माध्यमिक विद्यालयका पूर्व प्राचार्यहरुको उपस्थिति रहेको थियो । प्राचार्य हरिशकुमार ओझाले विद्यालयको वार्षिक प्रतिवेदन प्रस्तुत गरेका थिए ।
विद्यालय व्यवस्थापन समितिका अध्यक्ष चक्र बमको अध्यक्षतामा भएको कार्यक्रमको सहजीकरण शिक्षक नन्दराम बोहराले गरेका थिए । कार्यक्रममा विद्यार्थीहरुले विज्ञान तथा प्रविधि सामाग्रीको प्रदर्शनीका साथै विभिन्न सांस्कृतिक कार्यक्रमहरुको प्रस्तुति गरेका थिए ।
