धनगढी । भूमि समस्या समाधान आयोग कैलालीका अध्यक्ष यज्ञराज उपाध्यायले भूमि सम्बन्धी सबै खाले समस्या समाधान हुने बताएका छन् ।
शुक्रबार पद बहाली गरेका उपाध्यायले अहिलेको आयोगले जिल्लामा भूमि समस्या निराकरण गर्ने विश्वास लिएको बताए ।
उनले भने,‘अहिले पुनः आयोग गठन भएको छ । विगतका आयोगले गरेका काम जहाँबाट रोकिएका छन् । त्यहीँबाट यो आयोगले क्रमशः काम गर्ने छ । यो नै अन्तिम आयोग हुने छ भनिएको छ । कैलाली जिल्लामा सबै खाले समस्या निराकरण हुन्छ भन्ने मेरो विश्वास छ ।’
उनले हाल जिल्लामा एक लाख ३५ हजार भूमिहीन दलित,भूमिहीन सुुकम्बासी र अव्यवस्थित बसोबासीको तथ्यांक इन्ट्रि भएको बताए । उनले कैलाली जिल्लामा जग्गा नापजाँचको काम पनि करिब ६० प्रतिशत भइसकेको बताए ।
सरकारले ल्याएको भूमि सम्बन्धि अध्यादेशले भूभि समस्या समाधान आयोगलाई सघाउ पुग्ने उनले बताए । उनले भने ‘अध्यादेशले पनि आयोगलाई सघाउ पुग्ने छ । जिल्लामा रहेका भूमिहीन दलित,भूमिहीन सुुकम्बासी र अव्यवस्थित बसोबासी जग्गा वितरण सहज हुने अपेक्षा लिएका छौँ ।’
उनले भने ‘भूमि सम्बन्धी अध्यादेशमा कागजी रुपमा जंगल छ तर घना बस्ती छ भने जंगलको लगत कट्टा गरेर त्यो जमीनलाई नेपाल सरकारको नाममा ल्याए त्यहाँ बसोबास गरेका व्यक्तिलाई दिने कुरा राखेको छ ।’
२०७६ को माघ २८ भन्दा दश वर्ष पहिले यदी त्यहाँ बसोबास गरेर आएका छन् भने त्यस्ता व्यक्तिलाई जग्गा उपलब्ध गराउन सकिने छ भनेर गठन आदेशमा उल्लेख गरिएको उनले बताए ।
