काठमाडौं । भारतमा भएको रेल दुर्घटनामा ज्यान गुमाएका ७ जना नेपालीको सनाखत भएको छ । शुक्रबार परराष्ट्र मन्त्रालयले एक विज्ञप्ति जारी गर्दै ७ जना नेपाली मृत्यु भएको पुष्टि गरेको हो ।
मृत्यु हुनेमा कैलालीका २, अछामका ४ र बाँकेका १ जना रहेका छन् । दुर्घटनामा घाइते ४ नेपालीमध्ये ३ जनाको स्थानीय अस्पताल र बाँकी १ को गोदावरी अस्पताल जलगाउँमा उपचार भइरहेको परराष्ट्रले जनाएको छ ।
रेल दुर्घटनामा परेर कैलालीकी कमला नवीन भण्डारी, लछिराम पासी,अछामका हिमु नन्दराम विश्वकर्मा, नन्दराम पद्म विश्वकर्मा, मैसारा कामी विश्वकर्मा जोक्ला उर्फ कला कामी र बाँकेका राधेश्याम राधको मृत्यु भएको परराष्ट्र मन्त्रालयले जनाएको छ।
मृतकहरुको शव ल्याउन र घाइतेहरूको उपचारका लागि नयाँदिल्लीस्थित नेपाली दूतावास र काठमाडौंमा रहेको भारतीय दूतावाससँग समन्वय भइरहेको जनाइएको छ ।
माघ ९ गते साँझ महाराष्ट्र राज्यको जलगाउँ जिल्लास्थित भरधाडे स्टेसननजिकै रेल दुर्घटना भएको थियो । उक्त दुर्घटनामा नेपालीबाहेक अन्य ५ जनाको पनि मृत्यु भएको थियो ।
