धनगढी । सशस्त्र प्रहरी बल नेपाल नं. ३४ गण हेडक्वाटर कैलालीको १८ औँ स्थापना दिवस सम्पन्न भएको छ । आइतबार विविध कार्यक्रम गरी गणको स्थापना दिवस सम्पन्न भएको हो ।
कार्यक्रममा बोल्दै सशस्त्र प्रहरी बल नेपाल नं. ७ बाहिनी मुख्यालयका बाहिनीपति सशस्त्र प्रहरी नायव महानिरीक्षक दीपक अधिकारीले आफूहरुबाट सम्पादित काम नै पहिचान भएको बताए ।
उनले भने ‘हामीबाट सम्पादित कामहरु नै हाम्रा पहिचान हुन् । त्यो पहिचानसँग आवद्ध संगठनको इज्जत र प्रतिष्ठा जोडिएको हुन्छ । स्वस्छ,निर्भीक र जागरुक भइ आफ्नो जिम्मेवारी इमान्दिारता एवं थप सकारात्मक सोच र उर्जाका साथ कार्य प्रगतिका बाटोमा लैजानु सबैको जिम्मेवारी हो ।’
उनले सशस्त्र प्रहरीले सुरक्षा चुनौति रहेको यस जिल्लामा शान्ति सुरक्षा,सीमा रक्षार्थ परिचालित भएर राज्यद्वारा प्रदत्त विभिन्न कार्यादेश अक्षरशः पालना गर्दै संविधान सभा लगायत हालसम्म सम्पन्न भएका निर्वाचन सम्पन्न गर्न भूमिका निर्वाह गरेको बताए ।
कार्यक्रममा कार्यसम्पादनमा उत्कृष्ट,विभिन्न प्रतियोगितामा विजेता सशस्त्र प्रहरी कर्मचारीलाई पुरस्कार समेत वितरण गरेको थियो ।
कार्यक्रममा विभिन्न संस्कृति भल्किने प्रस्तुति समेत प्रस्तुत गरिएको थियो भने सशस्त्र प्रहरी बल नेपाल नं. ३४ गण हेडक्वाटर कैलालीका गणपति सशस्त्र प्रहरी उपरीक्षक दलबहादुर पाण्डेयले उपस्थित सबैलाई धन्यवाद ज्ञापन गरेका थिए ।
तस्बिरहरू
