धनगढी । स्वास्थ्य कार्यालय कैलालीले पाठेघरको मुखको क्यान्सर ‘एचपिभी’ खोप अभियान सम्बन्धी सञ्चारकर्मीसँग अन्तरक्रिया कार्यक्रम गरेको छ ।
कार्यक्रममा माघ २२ गतेदेखि फागुन ६ गतेसम्म जिल्लामा सञ्चालन हुने खोप अभियानका बारेमा जानकारी दिएको छ ।
स्वास्थ्य कार्यालय कैलालीका प्रमुख रमेश कुँबरले जिल्लामा ५० हजार छ सय १३ किशोरीलाई खोप लगाउने लक्ष्य राखिएको बताए ।
विद्यालयमा अध्ययनरत कक्षा ६ देखि १० सम्मका र विद्यालय बाहिर रहेका १० देखि १४ वर्षसम्मका किशोरीलाई खोप लगाइने उनले बताए । जिल्लामा ५ सय ४६ विद्यालय र १ सय ५९ अन्य गरि ७ सय ५ खोपकेन्द्र रहने उनले बताए ।
त्यस्तै खोप अभियानमा सात सय पाँच जना स्वास्थ्यकर्मी र एक हजार चार सय १० जना स्वायंसेवक परिचालन हुने उनले बताए । उनले जिल्लामा ५७ हजार भ्याक्सिन आइसकेकोले भ्याक्सिन अभाव नुहुने बताए ।
खोप ९८ देखि शतप्रतिशत प्रभावकारी भएको बताउँदै उनले यो खोप एक मात्रा मात्रै लगाइने बताए । कुँवरले लक्षित समूह नछुटोस भन्ने उदेश्यका साथ तयारी भइरहेको बताए ।
अन्तक्रिया कार्यक्रममा स्वाथ्य तालिम केन्द्रका निर्देशक नरेन्द्रसिंह कार्कीले विश्व स्वास्थ्य संगठनबाट प्रमाणित भएकाले खोप सुरक्षित रहेको बताए । उनले भने ‘खोप सुरक्षित छ । डराउनु पर्ने अवस्था छैन् । खोप सुरक्षित राख्नका लागि हो ।’
युनिसेफ धनगढीका प्रतिनिधी अशोक जोशीले १ सय ४५ देशमा प्रयोग भइरहेकोले खोप सुरक्षित रहेको बताए ।
