धनगढी । कैलालीको धनगढीमा मानवसेवा आश्रमको भवन निर्माणका लागि आर्थिक स्रोत जुटाउन ‘श्रीमद् भागवत सप्ताह ज्ञानविज्ञान महायज्ञ–२०८१’ को आयोजना हुने भएको छ ।
मानव सेवा आश्रमको आयोजनामा यही माघ २३ गतेदेखि ३० गतेसम्म महायज्ञको आयोजना हुन लागेको हो ।
आज पत्रकार सम्मेलन गर्दै धनगढी उपमहानगरपालिका–१ पशुपति टोलस्थित महोत्सवस्थलमा महायज्ञ आयोजना गर्न लागिएको मूल आयोजक समितिले जनाएको छ ।
धनगढी उपमहानगरपालिका–१५ मा निर्माणाधिन दुई सय जना सहयोगापेक्षी राख्ने क्षमताको मानव सेवा आश्रमको भवन निर्माणका लागि आर्थिक संकलन गर्न महायज्ञ आयोजना गर्न लागिएको हो ।
सेवाको स्थायित्वका लागि मानवसेवा आश्रम धनगढी शाखाको आफ्नै भवन निर्माण गर्ने अभिष्ट राखेर ज्ञानविज्ञान महायज्ञ गर्न लागिएको महायज्ञ मुल आयोजक समितिका संयोजक मदनबहादुर कुँवर बताए ।
धनगढी शाखाको २ सय जना सहयोगापेक्षीहरुलाई मानवोचित स्नेह प्रदान गन,बेसहारा मानवहरुलाई सेवा प्रदान गर्न,सुदूरपश्चिम प्रदेशलाई सहयोगगापेक्षी सडकआश्रित मानवमुक्त बनाउन,२०८२ सालभित्र सिंगो मुलुक सहयोगाापेक्षी सडकआश्रित मानवमुक्त नेपाल घोषणाको आधार तय गर्न,जेष्ठ नागरिकहरुका लागि मनोमञ्जन केन्द्रको स्थापना गर्न तथा मानवता अध्ययन केन्द्रको स्थापना गर्न महायज्ञको आयोजना गरिएको उनले बताए ।
महायज्ञमा प्रत्येक दिन बिहान ५ देखि ७ बजेसम्म पतंजली योगपीठका केन्द्रीय प्रभारी,लवदेव मिश्र लगायतबाट योग शिविर,विद्यार्थीहरु माझ सकारात्मक सोच, मानवता प्रवद्र्धन एवं व्यवहारिक शैक्षिक ज्ञान कार्यक्रम,श्रीमद भागवत कथा वाचन हुने जनाइएको छ ।
राष्ट्रिय र स्थानीय कलाकारहरूद्वारा भजन, कीर्तन र नृत्य,ख्यातिप्राप्त कलाकारहरूबाट गीत, संगीत, भजन, कीर्तन, झांकी, देवलीला, नृत्यहरू,पाञ्चायन पूजा, लक्ष्यवर्तिका, पितृ उद्दार, धान्याञ्चल, तुलादान, ग्रहशान्ति, ८४ पूजा, महामृत्युञ्जय,जप, पाठ परायण हुने आयोजकले जनाएको छ ।
त्यस्तै,महायज्ञमा ७ दिन चिकित्सक तथा स्वास्थ्य विशेषज्ञहरूवाट स्वास्थ्य परीरक्षण,महायज्ञकै अवसरमा मानवसेवा आश्रमले सहयोगापेक्षी सडक आश्रित मानवको अवस्था झल्किने गरी सडक र स्टेज दुवैमा नाटक प्रहर्सन हुने आयोजकले जनाएको छ ।
हाल धनगढी उपमहानगरपालिका–५ र वडा नं.१५ मा गरी २ वटा सेवा केन्द्रबाट ८० जना सहयोगापेक्षी सडक आश्रित मानवले आश्रम लिइरहेको जनाइएको छ ।
मानव सेवा आश्रमका केन्द्रीय अध्यक्ष रामजी अधिकारीले आर्थिक संकलन मात्रै नभइ मानवता प्रवद्र्धन गर्न पनि महायज्ञको आयोजना गरिएको बताए ।
