धनगढी । माघ २३ गतेदेखि धनगढीमा सुरू भएको महायज्ञमा एकजना बालकले दक्षिणाको रकम संकलन गरी महायज्ञमा दान गरेका छन् ।
शनिबार महायज्ञमा सहभागी हुँदै धनगढीका ७ वर्षीय राधे फुलाराले दसैँ, तिहार लगायतका चाडपर्वको दक्षिणा संकलन गरेर रु ५ हजार २० भवन निर्माणका लागि दान गरेका हुन् । ७ वर्षीय बालक फुलाराले गरेको सहयोगले आश्रमलाई थप हौसला र प्रेरणा मिल्नुका साथै भवन निर्माण सेवामा थप मद्दत पुगेको आश्रमले जनाएको छ ।
मानवसेवा आश्रमले धनगढी शाखाको भवन निर्माण गर्ने उद्देश्यले महायज्ञको आयोजना गरेको हो । धनगढी उपमहानगरपालिका–१ पशुपति टोलस्थित महोत्सव स्थलमा यही माघ २३ गतेदेखि सुरू भएको महायज्ञ माघ ३० गतेसम्म सञ्चालन हुने आश्रमले जनाएको छ ।
के हो मानव सेवा आश्रम ?
मानवसेवा आश्रम खुला आकाशमुनि सडक पेटी एवं सार्वजनिक स्थलहरूमा कष्टपूर्ण जीवनयापन गर्न विवश सहयोगापेक्षी, बेसहारा, असहाय, अशक्त, अभिभावकविहीन, शारीरिक तथा मानसिकरुपमा कमजोर मानवहरूको उद्धार, उपचार, पालनपोषण, संरक्षण एवं पारिवारिक पुनर्मिलनको सेवामा समर्पित छ । आश्रम वि.सं. २०६९ साल भाद्र १३ गते मुख्य कार्यालय मकवानपुर, हेटौँडाबाट औपचारिक रूपमा सेवा शुभारम्भ भएको हो ।
आश्रमले वि.सं. २०८२ सालभित्र स्वयं आफ्नो लागि आफै केही गर्न नसक्ने अवस्थामा रहेका, हेरचाह र पालनपोषण गरिदिने समेत कोही नभएका सहयोगापेक्षी (बेसहारा, असहाय, अशक्त, अभिभावकविहीन, मानसिक तथा शारीरिकरुपमा अति कमजोर) सडकआश्रित मानवमुक्त राष्ट्र नेपाल निर्माण गर्ने, घोषणा गरेको छ । घोषणा पश्चातको कार्यान्वयनलाई प्रभावकारी बनाउने संकल्प सहित हाल सात प्रदेशको २० जिल्लामा २६ ओटा सेवा केन्द्रहरूमार्फत ७७ ओटै जिल्ला रविदेशमा बेलायट, कतार, अष्ट्रेलियामा सहयोगापेक्षी सडकआश्रित मानवहरूको उद्धार र तिनीहरूको मानवोचित व्यवस्थापन गर्दै आइरहेको छ ।
