धनुषा । जनकपुरधाम उपमहानगरपालिका–८ बाट स्रोत नखुलेको रकमसहित तीन जना पक्राउ परेका छन् । पक्राउ पर्नेमा सिराहा कर्जन्हा नगरपालिका–९ बस्ने ३९ वर्षीय भुवनेश्वर राउत,भारत बिहार राज्य सितामढी थाना परिहार ग्राम पञ्चायत बराही बस्ने ४२ वर्षीय जामुन नायक र जनकपुरधाम उपमहानगरपालिका–८ स्थित न्यू अनुष्का मनी ट्रान्सफर ट्रेडर्सका कर्मचारी सोही उपमहानगरपालिका–८ बस्ने २६ वर्षीय जेनिस साह रहेका छन् ।
उनीहरुलाई नगद रु ५७ लाख ८४ हजार ६ सय ३५ , ३ थान मोबाइल र १ थान ल्यापटप सहित आइतबार दिउँसो प्रहरीले पक्राउ गरेको हो । मधेश प्रदेश प्रहरी कार्यालय जनकपुर र जिल्ला प्रहरी कार्यालय धनुषाबाट खटिएको प्रहरीले भुवनेश्वर र जामुनलाई नगद रु १० लाख, २ थान मोबाइल तथा जेनिसलाई रु ४७
लाख ८४ हजार ६ सय ३५, १ थान मोबाइल र ल्यापटप १ थान सहित पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको जनाइएको छ ।
